BR LA UNION – Awan ti anyaman a record iti barangay ti napapatay a seaman iti uneg mismo ti ab-abangan da a kuwarto idiay Zone 2, Barangay Catbangen, San Fernando City, La Union.
Iti pannakiuman ti Bombo Radyo kenni Vicente Bicumong, Chief Tanod ti Barangay Catbangen, ken maysa kadagiti nagresponde, awan ti anyaman a pakasarsaritaan ti biktima gaputa nasingpet daytoy ken sumagmamano laengen nga aldaw ket agsubli koman iti barko.
Maysa ni Bicumong kadagiti maburburtia-an iti pasamak, agsipudta awan ti nai-report ken napasamak a komosyon sakbay ti pammagsol ken awan ti nakita iti CCTV a nagturong iti pagnanaedan ti biktima.
Maipalagip a nagsagaba ti tallo a bagsol, kabilang ti dua iti barukong ken maysa iti bukot, iti biktima a maysa a 39-anyos, seaman ken agdama a vendor ti solar lights.
Iti inisyal nga imbestigasyon dagiti otoridad, maipagarop a nadiskubre laengen ti misis ti biktima, a dara-dara iti kawes ti mister na idi nakariing ken linukatanna ti silaw.
Natay ti biktima gaputi hypovolemic shock secondary to multiple stab wounds, maibasar iti panangamiris ni Dr. Alvin Ann Basangan, medical officer ti city health and wellness center.
Agtultuloy iti panangisayangkat iti naun-uneg nga imbestigasyon dagiti otoridad tapno duktalen ti kinasiasino ti suspek ken motibo iti krimen.
