LA UNION – Saan nga mapukawan dagiti maseknan a masapolanda ti lima nga mangingisda a mapukpukaw iti kabaybayan a paset ti probinsya iti Ilocos Sur.
Iti pannakiuman ti Bombo Radyo kenni Mike Sabado, information officer ti Office of the Civil Defense Regional Office 1, ituloy dagiti miembro ti Philippine Coast Guard iti panagsapol kadagiti mangngalap.
Maipalagip, naglayag dagiti mangngalap nga isuda Bunso Vergara, 44, Minandro Caasi, 37, Ranillo Campana, 32, Yvin Lopez, 27, ken Jerrick Caasi, 22, agpapada a taga-Concordia, Bolinao, Pangasinan idi bimmaliktan ti naglugananda a motorized banca nga addaan ti marka a “Danielle Maecee” iti kaadayo a 19 nautical miles manipud iti nasao a probinsya
Base iti impomasyon nga impatulod ti PCG-SUAL, naglayag ti lima idi July 21 ti alas 6 ti rabii iti likodan ti dakes a panawen ken saan pay nga nakaawid agingga iti agdama.
Impaganetget ni Sabado a saanda nga nagkurang iti palagip kadagiti mangngalap a saan nga aglayag no adda nakangato a gail warning gapu iti dakes a panawen.
