LA UNION – Nangbukel itan dagiti otoridad ti Special Investigation Task Group nga impangruna ni P/Supt. Ricardo Layug Jr, acting provincial director ti La Union Police Provincial Office (LUPPO) tapno ag-imbestiga iti pannakapapatay iti Barangay Chairman nga kabilang iti narcolist idiay Bauang La Union.
Iti pannakiuman ti Bombo Radyo La Union kenni P/Supt. Mary Crystal Peralta, chief regional public information officer ti Police Regional Office (PRO) 1, kinuna na nga isuda ti mangtutok iti panag-imbestiga iti pannakatay ni Barangay Parian Este Alejo Abuan.
Segun pay kenni P/Supt. Preralta, saanda pay nga ammo ti motibo iti krimen gaputa agtultuloy pay ti imbestigasyon no sadino ket maipagarop a mapukpukaw iti sling bag ti biktima a nalaon iti saan pay nga ammo a gatad ken cellphone.
Mangnamnama met dagiti otoridad nga iti pannakabukel ti task group ket maipaayan iti pannakailawlawag ti nasao a krimen iti kabiitan nga panawen.
Maipalagip, tinambangan ti dua nga lallaki a naka-helmet nga nagkalugan iti maysa a motorsiklo ti biktima nga agmanmaneho met ti motorsiklo na kasaruno iti panangpatay da kenkuana idi bigat kalman.
