LA UNION – Bangkayen a nasarakan ti maysa kadagiti tallo a nalmes iti kabaybayan ti Barangay Paringao, Bauang, La Union idi kalman.
Nabigbig daytoy a ni Ronnie Sobremonte, 21-anyos, residente iti nasao a lugar.
Maipalagip nga immunan a ginandat ni Sobremonte nga ispalen dagiti kasinsinna a da David Gil Perez, 22 ken Adelle Reanne Abril, 19, kalpasan a nalmes dagitoy iti kabaybayan .
Nupay kasta, ingguyod ti agkakapigsa a dalluyon ni Sobremonte bayat a ni Abril ket naideklara a dead on arrival.
Agtultuloy met ita a matamtaning iti Ilocos Training and Regional Medical Center ni Perez.
