LA UNION – Kaso a murder ken frustrated murder iti naidatag kontra iti ag-ama a suspek ti pammagsol a napasamak agarop alas 9:00 idi rabii ti Domingo, Hunyo 30, 2024 iti kawatiwatan ti kalsada idiay Barangay Pias, City of San Fernando, La Union.
Nakatayan daytoy iti biktima a ni Elmer Lubrin, agtawen ti 44, ken nakasugatan iti ub-ubing a kabsat na, managan Arnold Lubrin, agtawen ti 33, agpada a construction worker ken residente ti nasao a lugar.
Dagiti suspek ket ag-ama, isuda Dario Balanon, 42-anyos ken Daryl Balanon, agtawen-19, ken residente ti Barangay Namtutan ditoy siyudad.
Nagramot ti insidente gaputi maipagarop a panangi-pukkaw dagiti biktima a nakalugan ti motorsiklo, nga agsilaw dagiti suspek a nakalugan ti kurong-kurong bayat ti panag-dalyasat da iti kalsada.
Segun kenni Pol. Lt. Col. Fernando Acain Jr. agdama a hepe ti San Fernando City Police Station, uppat ti nakalugan iti nasao a kurong-kurong, a pakaibilangan ti dua a menor de edad nga anak met laeng ti main suspect.
Kinuna ni Acain, nagsagaba ti maysa a bagsol ngem fatal stab wound ni Elmer a nakatayan daytoy, idinto a ti ubing a kabsat na ket tallo a bagsol ngem nakalasat daytoy.
Ginandat dagiti suspek ti aglibas ngem saggaysa met laeng a natiliw dagitoy babaen ti tulong dagiti barangay officials ti barangay Pias, Namtutan ken Dallangayan.
Dead-on-arrival ni Elmer iti pagagasan idinto nga agtultuloy a maag-agasan ti kabsat na.
Kabayatanna, dagiti ag-ama a main suspect ket nakabalud itan idinto a dagiti dua a menor de edad ket nai-turnover iti Dept. of Social Welfare and Development (DSWD) para iti umno a disposisyon.
