Inimbestigaran ti Baguio City Police dagiti uppat a kadete ti Philippine Military Academy (PMA) a karaman ti maysa a kaso ti hazing a napasamak iti uneg mismo ti akademia.
Segun iti inisyal a report, dua kadagiti suspek ket 4th Class cadets bayat a dagiti dua pay ket manipud ti 1st Class ken 2nd Class.
Natakuatan iti imbestigasyon a ti biktima ket maysa a 4th Class cadet a nakapadas ti pisikal a panagabuso ken panangibabain manipud Setyembre 2 agingga Setyembre 29, 2024.
Kinuna ti kapulisan a saan laeng a namnaminsan iti insidente nu di ket maulit-ulit a daras a napasamak iti barracks. Ti biktima ket nakapadas kadagiti danog ken napalaos a pannusa nga isu’t rason iti pannakatumba a gapo iti nakaro a bannog ti bagi.
Idi Setyembre 29 napalabas a tawen, naamoan a kalpasan a nagsagaba kadagiti napipigsa a danog ti biktima ket gistayan daitoy a naawanan ti puot. Naiturong ti kadete idiay pay Quezon City para ti medical ken psychological treatment. Kamaudiananna, naipasubli metlaeng isuna idiay PMA Station Hospital ken na-discharge metlaeng idi Hunyo 30, 2025.
Iti agdama ket mangal-ala paylaeng ti kanayunan nga impormasyon ti Bombo Radyo Philippine manipud ti AFP ken PMA mainaig ti insidente, ngem awan pay ti sungbat da agingga ita.
