Pinagkedkedan iti maysa a federal appeals court ti panangipalubos iti administrasion ni United States President Donald Trump nga agkedked a mangi-issue ti passports kadagiti transgenders ken nonbinary Americans a mangipakpakita ti gender identities.
Nagkedked dagiti tallo a hues ti Boston-based 1st U.S. Circuit Court of Appeals tapno maitantan iti injunction nga inruar ti maysa a trial judge a manglapped iti U.S. Department of State a mangipatungpal iti maysa a polisia nga inadaptarna ti direksion ni Trump.
Awan pay iti komento ti White House.
Ti lawsuit ket maysa kadagiti sumagmamano a pakaseknan iti maysa nga executive order a pinirmaan ni Trump kalpasan ti panagsublina iti opisina idi Enero 20 a mangbilbilin iti gobierno a bigbigen laeng dagiti dua a biological sexes – iti lalaki ken babai.
Binilin met ti Presidente iti State Department a baliwan iti pagalagadan a mangipaay laeng ti passports kadagiti umiso ti nakailanad a katatao na.
Kalpasanna ket sinukatan ti departamento iti alagaden da ti “request the applicant’s biological sex at birth,” imbes a palubusan dagiti aplikante nga ilanad iti genderda ken iti laeng mabalin a pagpilyan ket lalake wenno babai.
Sakbay kenni Trump, pinalubusan ti State Department iti nasurok a tallo a dekada dagiti tattao a mang-update iti sex designations kadagiti pasaporteda.
Idi 2022 kabayatan ti panagtakem ni sigud a Democratic President Joe Biden, mabalin a pilyen dagiti aplikante iti “X” kas neutral sex marker kast met iti “M” wenno “F” para iti lalaki ken babai.
Kabayatanna, gaputi polisiya ni Trump ket nagdarum dagiti transgenders, nonbinary, ken intersex nga indibidual babaen ti ACLU a mangkonkontra iti saan a nakailintegan nga alagaden a manglaplapped kenkuada a makagun-od ti pasaporte a maitunos kadagiti gender identities da wenno iti “X” designation.
Immanamong met ni U.S. District Judge Julia Kobick ken kunkunana nga arbitrario iti patakaran ti State Department ken nairamut iti saan a nainkalintegan a panangidumduma kadagiti transgender nga Americano a nanglabsing iti equal protection rights iti sidong ti Fifth Amendment ti U.S. Constitution.
Ni Kobick, maysa a Biden appointee, ket immuna a nangipaulog iti narrow injunction a mangsaklaw kadagiti innem nga indibidual a demandante ngem idi Hunio ket napalawa daytoy iti intero a pagilian kalpasan a naipaayan ti class action status iti kaso.###
