Agtultuloy ti panangmonitor ti US iti maipagarup nga aliansa ken panagtitinnulong a natakuatanna iti nagbaetan ti China ken dagiti rebelde a Houthi a mangpegpeggad a mangdadael iti stability sadiay Red Sea.
Maibasar iti impormasion nga inruar ti sumagmamano nga international news organization, maipagarup a nagsinnukat ti China ken dagiti rebelde a Houthi kadagiti serbisio ken materiales ti gubat babaen ti komplikado ken nalimed a supply chain.
Iti sidong ti kasta a supply chain, pinalubosan dagiti rebelde ti panaglabas dagiti barko nga addaan iti bandera ti China, kasukat dagiti armas.
Ti kasta a sistema ket binukel dagiti rebelde sipud idi nangrugi ti agsasaruno a panangraut da sadiay Red Sea.
Babaen iti daytoy, dagiti rebelde ket makaaw-awat kadagiti advanced component para kadagiti ballistic ken cruise missile-da.
Maibasar met iti intelligence ti US, plano dagiti rebelde ti mangaramid iti ginasut a cruise missile a makabael a makadanon kadagiti pagilian iti Persian Gulf, usar dagiti military component a naawat da manipud China.
Nupay saan a direkta nga intudo ti US iti gobierno ti China nga adda iti likudan daitoy a plano, maulit-uliten a nakiuman ti Washington idiay Beijing tapno maidanon ti problema, karaman dagiti kompania a mainaig iti nadakamat a supply chain ngem awan pay laeng ti sungbat ti China iti daitoy nga pammabasol.
