Inlawlawag ti US Embassy a nakabase ditoy Pilipinas ti pudno a panggep ti ‘US Task Force Ayungin’ .
Maipalagip a pinasingkedan ni outgoing United States Defense Secretary Lloyd Austin III ti presensiya ti ‘US Task Force Ayungin’, maysa a military unit a buklen dagiti soldado nga Amerikano a nakabase ditoy Pilipinas.
Segun kenni US Embassy spokesperson Kanishka Gangopadhyay, ti nadakamat a task force ket mangipaay dalan tapno masuportaran ti US dagiti aktibidad ti Armed Forces of the Philippines (AFP) idiay West Philippine Sea.
Daitoy ket resulta ti kooperasyon ti baetan ti U.S. ken pwersa ti Pilipinas, kadwa ti Mutual Defense Board-Security Engagement Board (MDB-SEB) process ken ti Bantay Dagat framework.
Babaen daitoy ket mapapigsa ti panagkikinnadwa dagiti soldado ti dua a pagilian, maitandudo ken maprotektaran ti nawaya ken natalged nga Indo-Pacific Region.
Iti agdama ket awan pay ti kumpirmasyon ti Department of National Defense ken ti Armed Forces of the Philippines (AFP) mainaig ti nasao nga task force.
Kabayatanna, awan met ti kumpirmasyon nu ti nasao nga task force ket mangdakdakamat iti Ayungin idiay WPS.
Ti Ayungin ket maysa a bahura idiay WPS a nangisadsadan ti pagilian iti BRP Sierra Madre, ti World War II ship nga agserserbi kas outpost ti Armed Forces of the Philippines.
