Manamnama nga agtultuloy ti investments ditoy Pilipinas manipud America uray siasino ti mangabak iti baro a Presidente iti 2024 US elections segun iti Center for Strategic and International Studies wenno CSIS.
Segun kenni CSIS Southeast Asia Program Senior Fellow ken Director Gregory Poling, nupay agpannuray ti Republican ken Democratic parties iti ‘more protectionist policies’, agtultuloy ti panangibukbok dagiti pribado a kompania ti US iti kuarta ditoy Southeast Asia agraman ti Pilipinas.
Kinunana, no maipapan iti panangitandudo kadagiti aliansa ken panangsigurado a paset ti Pilipinas ti Indo Pacific Economic Framework ken ad-adu pay a panagpuonan, kinunana a nasaysayaat ni VP Kamala Harris.
Iti biang ni Trump, saan unay a nasirib nga agaramid iti aliansa ngem no maipapan iti panangbangon iti bilateral relationship, posible nga adda panagtalek ti PH iti daytoy.
Kabayatanna, kinuna ti Center for Strategic and International Studies a napateg nga ituloy ti person-to-person exchanges ken investment roadshows tapno mapaatiddog ti PH ti US investment opportunities kalpasan ti eleksion ti US.
Inrekomendana pay ti pannakapasayaat ti kinalaka ti panagnegosio ken ad-adu a reporma iti ekonomia tapno maallukoy ti ad-adu a panagpuonan.
