Inwaragawag ti Estados Unidos iti plano a mangipatungal ti visa bond a mabalin a dumanon iti agingana $15,000 para kadagiti turista ken negosyante manipud kadagiti pagilian nga addaan ti nangato a kaso ti visa overstay.
Iti programa ket paset ti 12-month pilot project nga addaan panggep a padasen no epektibo iti panagusar ti visa bonds tapno masigurado a pumanaw iti nakaituding a panawen dagiti ganganaet a sumarsarungkar iti sidong ti visa a B-1 (business) ken B-2 (tourist).
Immunan a naitandudo iti patakaran manipud iti Trump administration idi 2020 ngem saan dagos a naipatungpal.
Gapo iti daytoy, target ti polisiya dagiti pagilian nga addaan ti nasursurok ngem 10% overstay rate a kadawyan ket manipud iti Africa ken sumagmamano a paset ti Asya.
Segun iti report, maisubli iti bond no agawid a nasayaat dagiti sumarsarungkar iti pagilian, nagbalin a citizen ti Estados Unidos, wenno dagiti pimmusay.
Iti listaan dagiti pagilian a karaman ti programa ket mairuar iti travel.state.gov kalpasan iti 15 nga aldaw sakbay a maipatungpal.
Kabayatanna, kinondenar dagiti sumagmamano a sektor iti polisiya kas paset ti naing-inget nga addang iti immigration, bayat a nagballaag met iti US Travel Association a posible a bumba iti bilang dagiti ganganaet a sumarsarungkar idiay Amerika nga iti agdama ket makapadpadas ti 11.6% a panagbaba iti international tourism.#
