Pinasingkedan ni Philippine Ambassador to the United States Jose Manuel “Babes” Romualdez nga imbabawin ti Estados Unidos iti diplomatic ken tourist visas ni Leyte Representative ken sigud a House Speaker Martin Romualdez.
Segun iti ambassador, nadesisyonan ti visa revocation gapo iti pannakairaman ni Romualdez iti imbestigasyon mainaig kadagiti maanomalya a flood control projects.
Immunan a nangiruar ti Sandiganbayan iti precautionary Hold Departure Order (HDO) kontra kenni Romualdez mainaig ti kaso a plunder, direct ken indirect bribery, panaglabsing ti Anti-Graft and Corrupt Practices Act, ken iti money laundering.
Nainget a pinaglibakan ni Romualdez dagiti alegasyon ken impaganetget a dagitoy ket napakuyogan ti politikal a motibo ken awan iti natibker nga ebidensya na.
Agtultuloy iti pannaggun-od ti Bombo Radyo ti opisyal a reaksyon manipud iti kongresista.
