Manamnama a lumabes iti ₱21 trillion ti outstanding debt ti nasional a gobierno iti panagleppas ti tawen 2027, bayat a maplanplano met nga ingato iti panagutang ti gobierno inton sumaruno a tawen.
Maibasar iti Budget of Expenditures and Sources of Financing (BESF), mabalin a dumanon iti ₱21.48 trillion iti utang ti national government inton 2027, manipud iti mapatta-patta a ₱19.77 trillion ita a tawen 2026.
Karaman kadagiti banag a manamnama a mangpadakkel iti utang ket iti panagbaba ti balor ti pisos kontra iti doliar ken nabunbuntog a fiscal consolidation. Nangatngato met ti magastos iti panangpinansia manen kadagiti daan wenno immun-una nga utang gapu ti nangatngato nga interest rates.
Kabayatanna, plano ti gobierno nga umutang ti nasurok-kumurang ₱3.3 trillion inton 2027, a nangatngato ngem iti revised borrowing program ita a tawen.
Iti kauddian a medium-term fiscal program ti Development Budget Coordination Committee (DBCC), target ti gobierno nga in-inut a pababaen ti budget deficit manipud 5.4% ti Gross Domestic Product (GDP) inton 2026 agingga iti 3.5% inton 2030.
Segun ti Department of Budget and Management (DBM), agtultuloy a nakapamaysa ti fiscal program iti panagkissay ti deficit bayat a mapagtaltalinaed iti panaggastos para kadagiti kangrunaan a programa ken imprastruktura.###
