LA UNION – Pinatgan ti Valenzuela Regional Trial Court branch 282 iti kiddaw ni Senadora Risa Hontiveros a padar-ayen ni dismissed Bamban mayor Alice Guo iti panagdengngeg ti Senado inton bigat, Setyembre 17, seknan iti iligal nga operasyon ti Philippine Offshore Gaming Operators (POGO) ken dadduma pay.
Maibasar iti order, binilin ni Judge Elena Amano iti Phil. National Police nga iturong ni Guo idiay senado inton bigat, agarop alas-9 ti agsapa.
Naimandar pay ti panangipatungpal ti nairut a security protocol para iti suspendido a mayor.
Naiturong iti sala ni Judge Amano iti dua a graft cases ni Guo nga orihinal a naidatag idiay Capas, Tarlac Regional Trial Court branch 109.
Naiyakar ti kaso kalpasan a makwestiyon iti hurisdiksyon ti Capas RTC agsipudta iti nasao a probinsiya ti naggapwan ni Guo.
Nakaditene ita ni Guo kalpasan a saan a nagbayad ti piyansa iti korte iti kaso a panaglabsing iti Anti Graft and Corrupt Practices Act.
Immunan nga imbaga ni Hontiveros nga adu ti rumbeng nga ilawlawag ni Guo iti panagdengngeg.
Impaganetget ni Hontiveros, nga agsungbat ni Guo iti inaramid na a biddut iti umili a Pilipino.
