Inaprobaranen ti 24th Sangguniang Panlalawigan ng La Union, kabayatan ti maika-48 a Regular Session da, iti Provincial Ordinance No. 542-2026 para ti pannakabukel iti Voluntary Inclusive Employment and Local Incentives Program.
Ti ordinansa ket inlungalong ni Provincial Board Member Miguel Corleone B. Magsaysay ken sinuportaran dagiti amin a miembro ti Sangguniang Panlalawigan.
Paregtaen daitoy a gakat dagiti negosyo, agpupuonan, ken kontratista nga ipasigurado ti saan a bumaba a 75% kadagiti mangmangged kadagiti pasdek-negosyo ti probinsya ket kwalipikado a residente ti La Union.
Itantandudo pay iti ordinansa ti inklusibo nga empleyo babaen ti panangallukoy ti ad-adu nga oportunidad kadagiti marginalized sector, kas kadagiti Indigenous Peoples, miembro ti LGBTQIA+ community, senior citizens, solo parent, ken persons with disabilities (PWDs).
Nupay kasta, boluntaryo met iti panagtungpal iti programa, ken agtaltalinaed latta kadagiti employers iti sibubukel a bileg iti panagdesisyon ken panangala kadagiti empleyado da a maibasar iti propesyonal, teknikal, ken etikal a kwalipikasyon.
Imbes a mangipaulog iti pannusa ket idiay-diaya ti programa dagiti insentibo para kadagiti negosyo a makipaset.
Karaman ditan ti Agkaysa Seal of Excellence, pannakabigbig kas Priority Partners of La Union, panagbalin a kwalipikado iti tinawen a Best Employer Award, pribilehiyo ti Green Lane para iti naparpartak a pannakaproseso iti provincial clearance, ken libre a serbisyo iti job-matching & pre-screening a makatulong iti recruitment.
Segun iti Sangguniang Panlalawigan ng La Union, tarigagay ti ordinansa a papigsaen ti koordinasyon ti gobierno ken pribado a sektor, palawaen dagiti oportunidad iti trabaho para kadagiti Elyucanos, ken itandudo iti panagdur-as ti ekonomiya babaen iti panangala iti lokal a mangmangged.
