BR LA UNION – Imbes a sumango kadagiti mammanday-linteg, pinili ni Bise Presidente Sara Duterte ti saan a tumabuno iti umuna a panagdengngeg ti House Committee on Justice idi kalman, Marso 25, seknan iti sangsangwenna nga impeachment complaints.
Impaganetget ti bise presidente nga ad-adda nga ipamaysana ti panangtulong kadagiti umili nga agsagsagaba iti agtultuloy a panagngato ti presyo dagiti produkto a petrolyo, imbes a makipaset iti inawaganna a third fishing expedition ti kamara.
Iti official statement-na, impaganetget ni Duterte nga awan ti agraraira a pagannurotan a mangobligar iti maysa a respondent a pisikal a tumabuno kadagiti hearing.
Inakusaranna pay ti komite nga us-usarenda laeng ti imbitasyon para iti panagpulitika.
Prangka pay nga imbaga ni Duterte a rumbeng nga ibasura ti komite dagiti reklamo kontra kenkuana gapu iti kinakurang wenno awan ti naan-anay a pagibasaran.
Segun iti bise presidente, nangisubmitir ti kampo na iti opisyal a sungbat idi Marso 16.
Maipalagip a nagtignay ti proseso ti komite kalpasan a pormal nga indeklarana idi Marso 4 a dagiti dua a reklamo kontra kenni Duterte ket sufficient in form, substance, ken grounds.
