Natiklo ti inaramid a panangusar ti Department of Education (DepEd) babaen ti panangidaulo ni Bise Presidente Sara Duterte iti sertipikasion manipud iti Armed Forces of the Philippines tapno maikalintegan ti panagusar na iti confidential fund uray awan met ti maiyakar kadakuada a pondo.
Daytoy ti rimmuar iti hearing ti House committee on good government and public accountability idi mapagsasaritaan ti P15 million a balor ti confidential funds a naaramat a pagbayad kadagiti informants.
Sinaludsod ni Batangas 2nd District Representative Gerville “Jinky Bitrics” Luistro dagiti agdama nga opisial ken retirado nga opisial ti AFP mainaig iti inruarna a sertipikasion nga inusar ti DepEd iti liquidation ti P15 million confidential fund.
Segun kenni retired Major General Adonis Bajao, Lieutenant Colonel Carlos Sangdaan Junior, ken da Koronel Manaros Boransing ken Magtangol Panopio, ti sertipikasion ket mainaig iti Youth Leadership Summits (YLS) a naangay idi 2023.
Nagkedked dagiti uppat a nakaawatda iti pondo manipud iti DepEd para iti Youth Leadership Summits.
Daytoy ket pinasingkedan ni retired General Nolasco Mempin a maysa idi a DepEd Undersecretary.
Tapno nalawag, dinamag manen ni Luistro ken ni Mempin no awan ti inyalis ti DepEd a kuarta iti AFP para iti Youth Leadership Summits, garud, kinunana a saan.
Segun kenni Mempin, dina met ammo a mausar dagiti sertipikasion a mangpaneknek iti panagbayad kadagiti informer.
Kabayatanna, kinunan ni Boransing a ti Youth Leadership Summits ket pinondoan ti Philippine Army ken lokal a gobierno.
Impetteng ni Luistro ti nagdumaan ti sertipikasion nga insubmitir ti DepEd ken ti statement dagiti opisial ti militar.
Kinumpirmara met ni COA representative Attorney Gloria Camora a ti P15 million ket paset ti P75 million confidential fund nga pinaulogan ti COA ti notice of disallowance gapu iti kinakurang dagiti dokumento a makapaneknek iti naaramid a gastos.
Iti napalabas a hearing, dinamag ni Surigao del Sur 2nd District Representative Johnny Pimentel ti pannakausar ti P112.5 million confidential fund para iti seminar nangruna ta sumagmamano laeng ti nakipaset iti daytoy.
Naammuan iti hearing a ti special disbursing officer ti DepEd a ni Edward Fajarda ti akin-aramid iti P75 million cash advance manipud iti confidential fund.
Nausar ti sertipikasion manipud kadagiti soldado tapno marasonan iti pananggastos ti pondo.
