BR LA UNION – Kalpasan ti nasurok 20 a tawen a panaglemmeng iti linteg, natiliwen dagiti otoridad iti wanted person nga addaan ti kaso a qualified theft, maysa a krimen nga adda kaibatugan a pannusa iti sidong ti Article 310 iti Revised Penal Code.
Iti suspek nga agtawen ti 54, residente ti Barangay Tammocalao, Bacnotan, La Union ket naarestar iti joint police operation, agarup alas 11:40 ti bigat idi Hunyo 26, 2025 iti nasao a lugar.
Iti operasyon ket impatungpal ti City of San Fernando police station kas lead unit, kabinnulig da ti Regional Intelligence Division 1, Bacnotan Municipal Police Station, La Union Maritime Police Station (LUMARPSTA), ken Tactical Support Company – Regional Force Battalion 1.
Daytoy ket maiyannurot iti warrant of arrest nga inyetnag ti Regional Trial Court, Branch 29, San Fernando, La Union idi Abril 18, 2001.
Kabayatanna, inrekomenda ti korte iti 45,000 pesos a piyansa para iti temporaryo a pannakawaya-awaya ti suspek.
Kalpasan iti pannaka-amiris ti suspek, dagus a nai-turnover iti custodiya ti City of San Fernando police station.
