BR LA UNION – Nangiruar ti statement iti pamilya Aquino kalpasan nga ibaga ni Vice President Sara Duterte nga amangan nu maipada ti ama na a ni sigud a president Rodrigo Duterte iti napasamak kenni sigud a Senador Benigno “Ninoy Aquino Jr. a natay iti asasinasyon idi nagsubli ditoy Pilipinas.
Iti ababa nga statement nga inruar ti Ninoy & Cory Aquino Foundation idi kalman, Marso 24, impaganetget ti pamilya Aquino a nu adalen iti pakasaritaan, dackel a gid-yat wenno nagdumaan iti inaramid kenni Ninoy iti pagdal-dalanan ita ni sigud a President Duterte.
Kabayatanna, iti sabali nga statement iti X account, inawagan ni sigud a Senator Leila De Lima a maysa a desperado a gandat iti kunana a drama ni Duterte tapno libasan ti sung-sungbatanna.
Kinuna ti sigud a senador a ti hustisya ket saan a maala iti melodrama nudiket kinapudno, ken ti pakasaritaan ti mangdetermina ti nagdumaan.
Impaganetget pay ni de Lima a nagsubli ni Ninoy Aquino ditoy pagilian nga uray ammo na a biag na ti kasukat daytoy agsipudta ti kinatured na ket para iti ili, para iti demokrasiya ken para kadagiti umili a Pilipino.
Maipalagip nga iti maysa nga interview idiay The Hague, Netherlands, imbaga ti Bise Presidente a binallaagan na ti ama na a posible a maipada kenni Aquino nu ipilit na iti agsubli ditoy pagilian.
Nu subliyanan ti pakasaritaan, napapatay ni sigud a Senator Aquino idiay tarmac ti Ninoy Aquino International Airport (NAIA) a sigud a maaw-awagan a Manila International Airport idi Agosto 21, 1983 kalpasan a ma-exile idiay Amerika iti uneg ti sumagmamano a tawen.
Iti asasinasyon kenni Aquino ket napasamak iti sidong ti liderato ti ama ni President Ferdinand Marcos Jr. a daydi Ferdinand Marcos Sr. a a matudtudo nga adda iti likod ti maipagarop nga assassination, ngem saan pay a napaneknekan daytoy agingga iti agdama.
