Impadamag ti Department of Information and Communication Technology (DICT) a puntiria itan ti hackers dagiti website dagiti politiko ken kandidato iti masungad nga eleksion.
Iti press briefing ti Malacañang, kinuna ni DICT Secretary Ivan John Uy a gapu ta asidegen ti eleksion, agiwarwaras dagiti hackers iti peke nga impormasion maibusor kadagiti kandidato.
Dayta ti gapuna a kinunana a saanda nga agsardeng a mangsungbat kadagitoy a sitwasyon babaen ti panangidanon iti publiko ken sektor no kasano a rumbeng a papigsaenda ti cyber security system-da.
Kabayatanna, inlibak ti DICT a nakagun-od iti baro a datos dagiti hackers a nangpadas a serreken iti sistema ti Office of the President ken dagiti dadduma pay nga ahensia ti gobierno.
Segun kenni Uy, na-hack dagitoy a datos idi pay 2018 agingga 2022 ken in-repost da laeng tapno ipammarang a baro.
