Dua a tattaon ti kumpirmado a natay ken adu pay ti nasugatan iti agtultuloy nga wildfire idiay Los Angeles.
Dagiti uppat nga wildfire a maawagan iti ‘Palisades’ ket nangrugi iti nasurok a 24 nga oras ken nangdadaelen ti nasurok a 1193 nga ektaria ti sanikua.
Kinuna ni Los Angeles City Council President Marqueece Harris-Dawson a dakkel a karit ita ti panagsebseb iti uram agsipud ta saan da a makausar iti eroplano gapu ta napeggad pay unay iti agdama ti kasatoy a wagas.
Kabayatanna, agarup 2,000 a bombero ti agdama nga agtitinnulong a mangsebseb iti nasao nga wildfires.
Agtultuloy pay laeng ti imbestigasyon dagiti otoridad no ania ti nagtaudan iti uram.
Sumagmamano a gasut a ribu nga umili iti nasao a lugar ti naibakuit gapu iti peggad kasta met a kanseladon ti panageskuela dagiti agtutubo.
