Kinontra da House Assistant Majority Leaders Pammy Zamora iti Taguig City, Zia Alonto Adiong iti Lanao del Sur, ken Jay Khonghun ti Zambales ni Vice President Sara Duterte mainaig iti kinunana a saan na a pinangtaan ti biag da Presidente Ferdinand Marcos Junior, First Lady Liza Marcos ken Speaker Martin Romualdez.
Madanagan dagiti Young Guns ti kamara iti panagkedked ni Duterte iti kinunana ti maysa nga online press conference nga adda kinontrata nan a pumatay kenni Presidente Marcos, First Lady Liza Araneta-Marcos, ken Speaker Ferdinand Martin Romualdez nu adda mapasamak kenkuana.
Kinuna ni Zamora a ti kellaat a panagbaliktad ni Duterte ket maysa a desperado ken baluktot a panangpadas a mangallilaw iti panunot ti publiko.
Para kenni Adiong, dagiti statement ni Duterte ket rumbeng a matmatan a kas nakaro a pangta iti nasional a seguridad ken kasapulan ti madagdagus nga imbestigasion.
Kinuna ni Adiong a saan a daytoy ti umuna a gundaway a pinadas ni Duterte nga allilawen ti publiko.
Segun kenkuana, namin-adu a liniklikan ti bise presidente ti responsibilidad; manipud iti panagkedkedna a mangilawlawag iti panaggasto iti P125-million a kompidensial a pondo iti uneg ti 11 nga aldaw agingga iti illegal a pannakayakar dagiti pondo ti DEPED ken OVP.
Indagadag ni Khonghun iti National Bureau of Investigation (NBI) a papartaken ti imbestigasion iti kaso, nga impaganetgetna a dagiti pangta maibusor iti presidente ket maysa a serioso nga isyu ken napateg nga isyu ti nasional a seguridad.
