Inwaragawag ni Ukrainian President Volodymyr Zelensky nga agturong man isunan idiay White House tapno makisarak kenni US President Donald Trump inton aldaw ti Lunes, Agosto 18 tapno dakamaten ti panagibus ti gyera da kontra Russia.
Ti nakatuding a biahe ni Zelensky idiay White House ken kasaruno ti summit wenno one-on-one meeting ti nagbaetan da Trump ken Russian President Vladimir Putin idiay Anchorage, Alaska idi aldaw ti Biernes.
Nupay napaay ni Trump a makapartuat ti produktibo a katulagan kenni Putin mainaig ti gyera, nadakamat da met iti peace agreement a saan laeng a ceasefire.
Maipalagip a nagbalin a kontrobersiyal ti maudi a panagtaripnong da Zelensky ken Trump idiay Oval Office ti White House sadiay Washington DC idi Pebrero 28 ti agdama a tawen kalpasan ti saan a nasayaat a bilateral meeting dagiti dua a nagresulta ti pannakakanselar ti nakatuding a panagperma ti rare earth mineral agreement.
