BR LA UNION – Inikkan ti gunguna ti Department of Migrant Workers (DMW) Region 1 ti maysa nga Overseas Filipino Worker (OFW) a ni Felix Jacob Bernabe gapu iti tarigagay na a mapadur-as ti negosyo na a Good Harvest Organic Fertilizer Production idiay ili ti Aringay.
Kagiddan ti pannakapili na kas Likha Global Regional Winner, naiyawat met kenkuana ti maysa a tseke nga aggatad ti ₱100,000 kenni Bernabe.
Ni Bernabe ket agtrab-trabaho kas Merchandising Supervisor idiay British Virgin Islands iti uneg ti 11 a tawen manipud pay idi 2015.
Nakipaset isuna iti LIKHA Global Business Plan Competition tapno matungpal ti tarigagayna a negosyo a Good Harvest Organic Fertilizer Production.
Iti mensahe na, impeksa ni Bernabe ti nalaos a panagyaman na iti Department of Migrant Workers.
Impakaammo met ti DMW Region 1 a tuloy-tuloy ti panangsuporta da kadagiti Overseas Filipino Workers nga addaan tarigagay a maparang-ay iti bukod da a negosyo, saan laeng iti panagtrabaho idiay sabali a pagilian ngem uray pay dagiti agsubli ken agpuonan iti bukod a pagilian.
