BR LA UNION – Naisumiten ti Provincial Government of La Union (PGLU) iti Sangguniang Panlalawigan ti proposed budget ti probinsiya para iti Fiscal Year 2027 nga umabot iti ₱3,311,866,003.
Segun iti PGLU, naisubmitir ti singasing a badyet idi Setyembre 16, 2026 sakbay ti naikeddeng a deadline, maiyannurot iti Section 318 ti Republic Act No. 7160 wenno iti Local Government Code of 1991.
Babaen ti daytoy ket adda iti naan-anay a panawen ti Sangguniang Panlalawigan a mangadal, mangrepaso ken mangtalantan ti makidkidaw a pondo a mailatang para iti naduma-duma a programa, proyekto ken prayoridad ti gobierno probinsial sakbay ti panagdesisyon.
Sakopen ti proposed budget iti General Fund ken operasyon dagiti Local Economic Enterprises.
Pakailatangan ti pondo:
- ₱1,358,379,977 para iti sapasap a serbisyo publiko
- ₱673,746,336 para iti economic services
- ₱614,021,660 para iti social services
- ₱468,802,282 para iti panangipataray dagiti local economic enterprises
- ₱142,155,000 para iti calamity reserve
- ₱54,760,748 para iti debt servicing
Kangrunaan a pagtaudan ti pondo ket iti National Tax Allotment nga aggatad iti ₱2,692,963,721, malaksid kadagiti lokal a pamastrekan ken dadduma pay a pagtataudan iti kita ti gobierno probinsiyal.
Ti nasao a singasing a badyet ket dumalan iti komprehensibo a panangrepaso ti Sangguniang Panlalawigan, nga idauluan ti Committee on Finance, Budget and Appropriations babaen kenni Sangguniang Panlalawigan Member Teresita “Tess” O. Garcia.
Maisayangkat pay ti agsasaruno a budget hearing tapno marepaso dagiti detalye dagiti naisingasing a gastos ken maikeddeng no maitunos dagitoy kadagiti programa ken prioridad ti probinsia.
Segun iti PGLU, ti naisingasing a badyet ket paset ti pannakaipatungpal ti La Union: Agkaysa Agenda kas maibasar iti Provincial Strategy Roadmap nga addaan tarigagay a pagbalinen ti La Union kas Center of Innovation and Growth iti intero a Region I agingga inton tawen 2035.
