Target ti gobierno ti $12-million wenno agarup ₱724 million a grant manipud South Korea tapno mapasayaat ti serbisio ti salun-at para iti mapattapatta a 28 million a Filipino.
Iti sidong ti naisingasing a pannakitinnulong iti Korea International Cooperation Agency, mapapigsa ti diagnostic ken treatment capabilities ti New Urgent Care and Ambulatory Services wenno BUCAS Centers.
Karaman kadagiti naiplano a proyekto ket ti modernisasion dagiti pasilidad ti laboratorio, pannakapasayaat ti molecular testing para iti tuberculosis ken pannakairaman ti influenza surveillance kadagiti laboratory operations.
Manamnama a mabenepisiaran daytoy dagiti komunidad iti Ilocos Norte, Batangas, Pampanga ken Bataan.
