Limmawa iti kapasidad PGLU Pharmacy ken nanayunan dagiti agas para kadagiti sakit a kas ti hypertension, diabetes, cholesterol, antibiotics ken dadduma pay.
Nailatangan pay ti kanayunan a pondo dagiti medical missions ken kanayunan a supply ti agas a maibunong kadagiti district hospitals ditoy probinsiya.
Maipalagip a pormal a linuktan ti Provincial Government of La Union (PGLU) para iti publiko ti renovated PGLU Pharmacy, nga inisyatiba ni Gobernador Mario Eduardo C. Ortega idi Hulyo 6, 2026. Maibilang daytoy a kaunaan a licensed pharmacist ditoy rehiyon uno.
Pammaneknek daytoy iti commitment ti gobyerno probinsiyal a mapasayaat dagiti serbisyo pangsalun-at ken mapatibker dagiti public health facilities iti intero a probinsiya.
Segun kenni Marjorie Ann R. Lucero, Pharmacist III ti PGLU Pharmacy, kangrunaan a gagem ti programa ket tapno matulongan dagiti indibidual nga agkasapulan ti agas, nangruna dagiti senior citizen a regular nga agtum-tumar ti maintenance drugs para iti salun-atda.
Ngem inlawlawag ni Lucero a silulukat ti serbisyo iti amin nga edad, saan laeng a kadagiti nataengan ngem ketdi kadagiti dadduma pay nga agkasapulan ti agas, masurot laketdi iti proseso ken available laketdi dagiti agas.
Tapno masiguro iti naannayas a proseso iti panagala ti libre nga agas, tunggal indibidwal ket nasken nga agturong iti clinic tapno makaala ti Individual Treatment Record (ITR) wenno reseta.
Malaksid iti medisina, mabalin pay a makagun-od dagiti kualipikado nga indibidual iti bitamina, a maibasar iti kaadda dagiti abasto.
Saan laeng nga agas iti idiay-diaya ti pasilidad; mangipaay da pay iti libre a panangeksamen ti salun-at, panang-monitor iti presyon ti dara, pitik ti puso, ken panangala ti timbang.
