BR LA UNION – Natay ti maysa a senior citizen bayat a 12 dagiti nadun-dunor agraman ti dua a driver iti panagdinnungpar ti van ken truck iti kawatiwatan ti national highway sakop ti Barangay Napaset, Luna, La Union agarop alas 3:45 ti parbangon idi kalman, Hulyo uno, 2026.
Karaman iti aksidente ti maysa nga hi-ace van, minaneho ti managan Carl Darren Abayon, agtawen ti 25, residente ti Paliparan 3 Mabuhay, Dasmarinas City, Cavite ken maysa nga Isuzu wing van truck, minaneho ti managan Mark Lester Batangan, agtawen ti 37, tubo ti Barangay San Marcelino, Dingras, Ilocos Norte.
Iti eksklusibo nga interview ti Bombo Radyo kenni PCPT FEBERICK TALINGDAN, chief of police ti Luna Municipal Police Station, ti hi-ace van ket nagluganan iti siyam a senior citizen ken agpapada a miyembro ti Federation of Senior Citizen of the Philippines (Puerto Princesa Chapter) ken residente ti Puerto Princesa City, Palawan.
Segun kenni PCPT Talingdan, maibasar iti imbestigasyon dagiti otoridad, ti van ket naggapo idiay Manila ken agturong da koma idiay Vigan City, Ilocos Sur tapno agpasyar bayat a ti truck ket naggapo iti Norte nga agturong idiay Manila.
Segun iti hepe ti pulisiya, maipagarop a nakaridep ti driver ti van isunga naka-agaw ti linya iti kasinnabat na a truck, puon ti panagdinnungpar dagitoy.
Gaputi kapigsa ti impact ti aksidente, nabaliktad ti van a nagluganan dagiti senior citizen ken nagsagaba dagitoy ti pannakadundunor iti bagi.
Naideklara a dead-on-arrival idiay Balaoan District Hospital ti 80-anyos a senior citizen bayat nga agtultuloy a maag-agasan dagiti dadduma iti nasao nga ospital.
Kabayatanna, ti Isuzu Truck ket nadadael iti kannigid a paset daytoy (from front of rear wheel to rear bumper) bayat a ti Hi-Ace Grandia ket nagpasar ti nakaru a pannakadadael, ngem saan pay a nadetermina nu manu ti balor ti damages dagiti lugan.
Mainaig ti daytoy, nagpalagip ni Police Captain Talingdan kadagiti drivers a siguradwen a naka-kondisyon ti bagi ken uray iti lugan sakbay nga agbiyahe tapno maliklikan ti aksidente iti kalsada.
