BR LA UNION – Agtultuloy a mailunglungalong iti House Bill No. 182 wenno “Universal Social Pension Act,” maysa a singasing linteg a nairanta a mangipaay ti binulan a pension iti amin a senior citizens ditoy pagilian kas panangbigbig ti kontribusyonda ken tapno makatulong iti inaldaw a pagkasapulan dagitoy.
Segun kenni Hon. Miguel Corleone “Migz” B. Magsaysay, Board Member iti 1st District ti La Union, addan itan iti committee level ti nababa a pagpandayan linteg ti kongreso ti nasao a gakat para iti panagdengngeg.
Nu mai-transmit idiay Senado, maipasidong iti proseso a panangadal ken pannaka-aprubar daytoy.
Inlawlawag ni Magsaysay a napigsa iti suporta dagiti naduma-duma nga grupo para iti nasao a singasing linteg.
Kinunana a nakagun-od ti adu a suporta ken pirma tapno maipasa iti gakat idiay kongreso babaen iti panagtitinnulong dagiti barangay kapitan, National Commission of Senior Citizens (NCSC), Federation of Senior Citizens Associations of the Philippines (FSCAP), ken dadduma pay nga advocacy groups.
Iti agdama, umaboten ti nasurok a tallo a milyon a pirma dagiti senior citizens iti intero a pagilian a mangsuporta iti singasing linteg. Nupay kasta, namnamaen nga ngumato pay ti nasao a bilang agingga iti lima a milyon nga pirma sakbay ti State of the Nation Address (SONA) ni Presidente Ferdinand Marcos, Jr.
Maibasar iti datos, adda ti agarop 12 milyon a senior citizens iti intero a Pilipinas. Gapu iti daytoy, maallokoy iti amin a senior citizens nga agparehistro iti National Commission of Senior Citizens tapno ammo ti gobierno no aktibo pay dagitoy ken ania ti kasasaadda.
Iti sidong ti House Bill No. 182, tunggal kwalipikado a senior citizen ket maipaayan iti agarop ₱1,000 a binulan a pension, ken posible pay a ngumato daytoy iti masakbayan, maibasar iti kapasidad ken polisiya ti gobierno.
No maipatungpal kas linteg, amin a Pilipino a 60-anyos ken agpangato ket mabenipisyaran iti nasao a programa,tapno mapatibker ti pinansiyal a seguridad dagiti senior citizens anyaman ti kasasaad dagitoy iti panagbiag.
Ni Congresswoman Mila Aquino-Magsaysay ti United Senior Citizens Partylist iti kangrunaan a mangilunglungalong ti nasao a singasing linteg.
