BR LA UNION – Personal nga indanon ni President Ferdinand Marcos Jr. iti P100 milyon a tulong pinansiyal kenni General Santos City Mayor Lorelie Pacquiao iti panagturong ti Presidente idiay Mindanao idi kalman, Hunyo 10, 2026.
Ti nasao a pondo ket mausar iti panang-patarimaan iti General Santos City Hall.
Kinuna ni Pres. Marcos, nagtaud ti pondo iti Local Government Support Fund.
Inyanunsiyo pay ti Presidente nga amin a pamilya a natayan ket makaawat ti sag P50,000 nga ayuda.
Maibasar iti kauddian a listaan ti National Disaster Risk Reduction and Management Council, umaboten iti 46 nga indibidwal ti naipadamag a natay gaputi napigsa a gingined idi Lunes, Hunyo 8.
Ikkan pay ti pinansyal nga ayuda ni Presidente Marcos iti local government ti Sarangani ken South Cotabato para met iti panang-simpa kadagiti nadadael nga imprastraktura.
Segun kenni President Marcos, iti Sarangani ti hardest hit a lugar idiay Mindanao.
Binilin metten ni President Ferdinand Marcos Jr. dagiti concernced government agencies a paspasan iti panangipaay ti tulong ken panangsimpa dagiti imprastraktura para kadagiti biktima ti napigsa a gingined.
Nagturong idiay Gensan idi kalman, Hunyo 10, ni President Marcos Jr. tapno personal nga i-assess iti sitwasyon ken nagibuong ti tulong.
Siniguro pay ti Presidente a nakatutok met ti National Housing Authority (NHA) iti panang-suporta dagiti mangisursuro ken dadduma pay a residente a nakapadas ti pannakadadael ti pagtaengan.
Malaksid iti pak-pakauna a relief goods, taraon, ken serbisyo medikal, siniguro pay ti gobyerno a maikkan ti tulong pinansyal dagiti mangmangged a naapektaran iti temporaryo a panagrikep dagiti establisyimento iti sidong ti sistema a No Work, No Pay.
