LA UNION – Madama a sapsapulen iti search and rescue team ti maysa a mapukpukaw a beach goer idiay baybay ti Barangay Taberna, ili ti Bauang, La Union.
Base iti report a nakalap ti Bombo Radyo manipud iti Bauang Police Station, nabigbig ti 16-anyos a mapukpukaw a ni Vicente Kulas ti Barangay Baculungan Sur, ili ti Bugias, Benguet.
Maipagarup a nagtutulag nga ag-picnic ken agdigos idiay baybay dagiti agkakabagyan kaddua ti biktima.
Kabayatan nga agdigdigus iti baybay ti biktima kaddua ti dadduma pay a kakabagyan daytoy ket killat a nagatab ti dalluyon iti baybay agarup alas-9:00 itattay bigat.
Dua kadagiti beach goers ti insalakan dagiti residente sadiay, ngem napaayda met a maalaw ti nasao biktima.
Kabayatanna, immunan a nangiruar iti gale warning ti Pagasa ken nangipaay pay ti patigmaan a nadalluyon iti kabaybayan a sakupen ti Ilocos ken Central Luzon Region gapu iti epekto ti northeast monsoon. (Absalom Flores)
