LA UNION – Madama iti imbestigasyon ti pulisya iti napasamak a karambola iti innem a lugan a nakatayan ti maysa a truck driver ken nakasugatan met iti 10 pay a biktima iti kawatiwatan ti national road idiay Barangay Udiao, ili ti Rosario, La Union itattay alas-6:45 ti bigat.
Iti pannakiuman ti Bombo Radyo kenni C/Ins. Bernabe Oribello, hepe ti Rosario Police Station, kinunana a posible a pimmalya iti preno ti 1o-wheeler truck a nagkarga iti abono a minaneho ni Mark Anthony Locquiao, 25, residente ti Urdaneta City, Pangasinan isu a nadalapus dagiti lima a sarsarunnuenna a lugan a pakaibilangan iti maysa pay a 10-wheeler truck, dua a traysikel ken dua pay a bus, ken dimmungpay daytoy iti maysa a balay.
Posible a napartak met iti panagtaray ti truck nga iggem ni Locquiao gapu ta arigna a napaabante pay dagitoy kangrunaan iti dua a bus a mangidisdisaag kadagiti pasahero.
Dead on the spot ni Locquiao gapu iti nakaro a sugat a napasaranna iti bagi, kabayatan a naiturong iti kaaseggan nga ospital dagiti nasugatan a pasahero a naglugan kadagiti traysikel ken bus.
Kabayatanna, ur-urayen pay laeng iti pulisya ti pangngeddeng dagiti biktima no mangidatag dagitoy iti reklamo gapu ti napasamak nga aksidente.
