LA UNION – Agtultuloy pay iti imbestigyon ti pulisya iti napasamak nga aksidente a nakairamanan ti tallo a lugan nga nakatayan ti maysa nga indibidwal kabayatan a 14 ti nasugatan iti kawatiwatan ti National Highway iti Barangay Villaros idiay ili ti Bagabag, Nueva Vizcaya kagiddan ti pananglagip ti Good Friday.
Kinuna iti Bombo Radyo ni C/Ins. Ferdinand Laudencia, hepe ti Bagabag Police Station, napukawan ti kontrol iti panagmaneho ti trailer truck nga addaan ti karga a 1,100 bags ni Joey Remigio, residente ti Barangay Del Corpuz, Cabatuan, Isabela iti agsikko nga kalsada isu a napasamak ti aksidente.
Gapu iti daytoy, dimmungpar ti trailer truck iti nakasinnabat na nga L300 van a minaneho ni Peter Ortez, 38, resident ti Parañaque City; ken iti High Ace van a minaneho ni Freddie Macadangdang, 41, agnanaed ti ili ti Bayombong, Nueva Vizcaya.
Dead on the spot ti kadua a broker ni Ortez a ni Nazareno Relado, 41, residente ti Las Piñas City; ken nasugatan ti maysa pay nga kaduada a ni Raymundo Go, 38, ti Tondo, Manila.
Agpapada a nasugatan dagiti pasahero ti Hi-ace van nga iggem ni Freddie a da Marivic Macadangdang, 49; Xhyrus Macadangdang, 11, grade 5; James Llacas, 27; Mary Joyce Llacas, 24; Rhiana Joyce Llacas, 5; Daryl Ann Bibay, 26; Lilia Macadangdang, 70; Teresita Padilla, 55; Flordelina Magallanes, 38; ken ni Daryl Ann Bibay kadua ti innem a bulan na a maladaga a ni Avryl Antonette Bibay, agpapada a residente ti Bayombong ken Solano, Nueva Vizcaya.
Inturong ti resue team iti kaasetgan nga pagagasan dagitu nasugatan a pasahero kabilangen dagiti drivers dagiti nasao a lugan tapno matameng, kabayatan nga adda iti maysa a punerarya ti bangkay ni Relado.
Segun pay kenni Laudencia, napartak iti taray ti truck gaputa bimmaliktad pay daytoy iti nakasinnabat a L300 van a nakangato dagiti pilied na, bayatan nga naipit iti baetan dagitoy ti Hi-ace van.
Kabayatan na, boluntaryo a sumuko iti kuerpo ti pulisya iti driver ti trailer truck.
