Maysa ti pimmusay bayat a dua iti nadundunor iti aksidente a nakairamanan iti tricycle ken motorsiklo iti Provincial Road a masakupan iti Brgy. Quirino, Bacnotan, La Union agarup alas-2:30 tattay malem, Marso 18.
Nabigbig ti pimmusay a pasahero iti tricycle a ni Ricardo Soriano, 60-anyos, bayat a nabigbig met ti nadundunor a driver iti tricycle a ni Mark Stephen Casugay, 29-anyos, agpada a residente iti Brgy. Bitalag, Bacnotan, La Union.
Nagsagaba met iti minor injuries ti driver iti motorsiklo a ni Kelvin Cruz, 28-anyos, residente iti Brgy. Nalvo Norte, Luna, La Union.
Base iti inisyal nga imbestigasyon iti Bacnotan Police, daldalyasaten iti motorsiklo a minaneho ni Cruz ti amianan a laud a direksyon iti kalsada bayat nga agturong met iti abagatan a daya ti tricycle a minaneho ni Casugay pauneg iti kalsada a mangkonektar idiay Brgy. Ballogo idi nadungpar iti motorsiklo ti tricycle.
Ginandat pay ni Cruz a liklikan ti tricycle a bimmalasiw ngem naala na latta daytoy.
Gapu iti kinapigsa ti impact iti insidente, naipurwak dagiti nakalugan iti tricycle ken nakuppit ti behikulo.
Naitaray iti pagagasan dagiti biktima para iti pannakataming da no sadinno nagsagaba iti head injury ni Casugay ken naglak-am iti pannakadundunor ni Cruz bayat a naideklara a natay babaen iti doktor ni Soriano.
Naamwan a paawiden dagiti biktima idi napasamak ti insidente.
Agtaltalinaed pay laeng iti pagagasan ni Casugay bayat a nakarwaren ni Cruz.
Agtultuloy pay laeng ti isaysayangkat nga imbestigasyon dagiti otoridad mainaeg iti nadakamat nga insidente.
