LA UNION – Agtultuloy a maag-agasan idiay ospital iti dua a nasugatan, kabayatan a malamlamayan itan ti maysa a kadduada a karaman iti naaksidente a motorsiklo idiay Barangay Ma. Cristina West, ili ti Bangar, La Union.
Nabigbig dagiti nasugatan a biktima nga isuda Wowie Jaramilla, 19, nagmaneho ti nasao a motorsiklo, residente ti Barangay Paratong 3, Bangar; ken ti maysa a 15-anyos a balasitang a taga-Tagudin, Ilocos Sur; kabayatan a malamlamayan itan ni Dennis Jaramilla ti Barangay Paratong 3.
Base iti imbestigasyon ti Bangar Police Station, kabayatan nga agmamaneho ni Wowie iti nadakamat a lugan ken kalubbonna iti dua ket killaat a naiyablat daytoy iti sementado a kalsada.
agpapada a naiturong iti kaaseggan nga ospital dagiti tallo, ngem nauyos iti biagna ni Dennis gapu iti nakaro a napasaran a dunor daytoy iti bagi.
Maipagarup nga awan iti suot a helmet dagiti biktima idi a napasamak ti aksidente.
