LA UNION – Arestado ti 10 a mangngalap a naaktuan nga simrek ken nagtakaw iti uneg ti Vietnamese vessel a nakasanglad iti pantalan ti Poro Point iti syudad ti San Fernando, La Union idi rabii.
Iti pannakiuman ti Bombo Radyo kenni Lt. Commander Benidicto Bartolome ti Philippine Coast Guard (PCG)-San Fernando, kinuna na a tinurongda ti barko kalpasan nga makaawatda ti impormasyon maipapan iti panangsirrek dagiti lallaki iti nadakamat a lugan pangbaybay.
Naaktuanda dagiti suspek nga iluglugan ti maysa a ruangan ti barko iti bangka isu a dagusda nga inarestar dagitoy.
Segun kenni Bartolome, nadadael ti nasao a barko gapu iti napalabas a panagduprak ti bagyo isu a temporaryo nga adda iti baybay ti San Fernando.
Kabayatan na, kinuna met ti maysa kadagiti suspek a ni Freddie Manongdo, saanda nga ammo a maipawil ti panagsirrekda iti uneg ti barko.
Nagustuanda laeng ti ruangan ti barko tapno aramiden a lamisaan.
Iti agdama, agtaltalinaed iti San Fernando City Police Station dagiti suspek ken maipaspasidong iti imbestigasyon.
