LA UNION – Rinuk-atanen iti pulisya dagiti 10 a mangngalap a maipagarup a natiliwan nga agtaktakaw iti uneg ti nakaangla a nadadael a Vietnamese sea vessel idiay pantalan ti Poro Point, syudad ti San Fernando, La Union.
Iti pannakiuman ti Bombo Radyo La Union kenni C/Ins. John Guiagui, hepe ti San Fernando City Police, kinunana a rinuk-atanda dagiti suspek ken saanen a naidatag ti gapu ta awan iti nagparang a complainant tapno idatag dagitoy iti pangukuman.
Sigun kenni Lt. Commander Benedicto Bartolome ti Philippine Coast Guard (PCG) -San Fernando, nangisayangkat iti inspection iti tauhanda idiay uneg ti barko ken atapenda nga adda dagiti nagaraw nga alikamen, ngem iti laeng makingkukua iti nasao a lugan ti makakompirma no adda dagiti napukaw nga alikamen.
Immuna iti daytoy, tiniliw iti kameng ti PCG dagiti mangngalap kalpasan a maaktuan dagitoy a maipagarup a simrek ken nangitaray ti sumagmamano a piyesa ti barko idi rabii ti Myerkules. (Absalom Flores)
