Ilunglungalong ti Sangguniang Panlalawigan ti La Union a mapalawa iti panangbigbig kadagiti organisasyon a mangipapaay ti napateg a kontribusyon para iti pagimbagan ti kommunidad, babaen iti panangbaliw kadagiti sumagmamano a probisyon ti Basi ken Abel Awards.
Iti sidong ti Draft Provincial Ordinance No. 714-2026, nga insurat ni SPM Jeferson B. Fernando ken kaduana a nangisurat dagiti amin a kameng ti Sangguniang Panlalawigan, itantandudo iti panangpili ti sangapulo a naisangsangayan nga organisasyon a mabigbig kas Ten Outstanding Basi and Abel Awardees, imbes a tallo laeng nga awardee ti tunggal kategorya.
Nakailanad iti ordinansa, tunggal mapili nga organisasyon ket umawat iti plake ken cash prize a ₱25,000.
Maibasar pay iti singasing nga ordinansa, a maisayangkat ti seremonya kadagiti Basi ken Abel Awards iti panawen ti Pammadayaw, kas paset ti tinawen a pananglagip iti Foundation Anniversary ti probinsiya, imbes nga iti aktibidad ti La Union Coalition of Civil Society Organizations (LUCCSO) Week.
Tarigagay ti Draft Provincial Ordinance No. 714-2026 a palawaen ti pannakabigbig kadagiti Civil Society Organizations (CSOs), Non-Government Organizations (NGOs), People’s Organizations (POs), ken dadduma pay a maikari nga organisasyon a mangitag-ay iti pagimbagan ti publiko, panagrang-ay ti komunidad, ken nasayaat a panagturay iti La Union.
