Pinalagipan ti Department of Labor and Employment (DOLE) dagiti employers nga obligadoda a mangted ti 13th-month pay kadagiti empleado iti saan a naladladaw ngem Disiembre 24.
Segun kenni DOLE Secretary Bienvenido Laguesma, awan ti exemption iti pannakaipaay ti nasao a benepisio gapu ta maibilang daytoy nga statutory rights dagiti mangmangged ken napateg para iti panaggastos kadagiti kasapulan dagiti pamilia ita nga holiday season.
Saklawen ti 13th-month pay dagiti amin a rank-and-file employees iti private sector, aniaman iti posision, employment status, wenno wagas ti panagpasueldo, no la ketdi nagtrabahoda iti saan a bumaba ti maysa a bulan ita a tawen. Karaman ditoy dagiti piece-rate workers, dagiti empleado nga addaan ti fixed wage plus commissions, trabahador nga addaan iti adu nga employers, sigud a nag-resign wenno naikkat, ken dagiti nag-maternity leave nga addaan ti salary differential.
Ti minimum a 13th-month pay ket katupag ti one-twelfth(1/12) ti pakabuklan a basic salary a napastrekan ti maysa nga empleyado iti las-ud ti maysa a tawen.
Impalagip pay ti ahensia nga agsubmitir dagiti employers ti compliance report da iti DOLE Online Compliance Portal agingga Enero 15, 2026, a naglaon ti impormasyon maipanggep iti kompania, bilang dagiti empleado, listaan dagiti benepisiario, ken gatad ti naawat a benepisio.#
