BR LA UNION – Nakailista ti Office of the City Health ditoy San Fernando, La Union iti 15 a kaso ti acute gastroenteritis iti week 20 ita a tawen, wenno manipud May 11 to May 17, 2025.
Daytoy ti kinumpirma ni Bernalixe A. Caballero Nurse 1 iti Office of the City Health ditoy San Fernando.
Inlawlawag na a ngimmato ti kaso ti acute gastroenteritis ita a tawen iti uneg ti nasao a morbidity week kumpara iti 5 cases idi napalabas a tawen, agsipudta dimmur-as iti health care access ken health care services, wenno kaipapanan daytoy nga immadu ti health care facilities a mangdetermina iti health conditions ti tao.
Segun kenni Caballero, iti sakit a gastro-enteritis ket mabalin a maala iti kinarugit, kontaminado a taraon ken danum.
Iti kangrunaan a simtomas ti sakit ket panagbakwar ken diarrhea.
Iti city health office ket mangipat-patungpal kadagiti naduma-duma nga addang, a pakaibilangan ti daily monitoring, field surveillance, medical treatment, ken public health advisories, tapno maimpormaran a naimbag dagiti nagannak maipapan iti rumbeng nga aramiden tapno maprotektaran ti salun-at dagiti ubbing.
Dadduma pay a sakit a bantayan ti city health office iti panawen ti panagtutudo partikular ditoy siyudad ti San Fernando ket iti sakit a dengue, leptospirosis ken typhoid fever.
