BR LA UNION – Umaboten ti 77 ti nailista a kaso ti “Super Flu” ditoy pagilian, maibasar iti baro a datos ti Department of Health (DOH).
Segun kenni Health Spokesperson Albert Domingo, nairekord ti nasao a datos idi Disyembre ken inlawlawagna a ti ‘super flu’ ket maysa a variant ti influenza A wenno trangkaso ken impaganetgetna a saanen a baro a sakit.
Inlawlawag ni Domingo nga awan ti nagdumaan dagiti sintomas ti super flu kadagiti gagangay a sintomas ti trangkaso kas iti uyek, panag-panateng, panaggurigor ken sakit ti bag-bagi.
Iti laksid daytoy, impaganetget met departamento a masansan nga umadu dagiti kaso ti respiratory infections kadagitoy a panawen gapu iti panagbalbaliw ti paniempo.
Inlawlawag pay ni Domingo a gaputa Enero, dakkel latta ti posibilidad nga agbaliw ti panawen, isunga posible ti panagsagaba ti irritation iti agong ken karabukob.
Kabayatanna, inallokoy ti DOH ti publiko nga agusar ti face mask kas proteksiyon ken panagannad kadagiti kastoy a kasasaad ngem saan a kayat a sawen a kumaro wenno makaakar ti kaadda ti trangkaso.
