LA UNION – Nagkakaddua ti naduma-duma a sektor a nakipaset iti unity walk kontra ti illegal drugs idiay syudad ti San Fernando, La Union itattay bigat.
Iti patta-patta ti San Fernando City Police, immabot iti nasurok a 1,500 a tattao karaman dagiti surrendered drug personalities ti nakimartsa idiay syudad tapno ipamatmat ti suporta iti war on drugs ti gobyerno.
Iti panagbitla iti programa ni City Mayor Dong Gualberto, impaganetgetna ti panagpapada ti panagkita kadagiti kakailyan a sigud a naigamer iti droga ken agtartarigagay itan nga agbalbaliw.
Kinnidawa pay ti alkalde iti panagkaykayasa dagiti umili tapno labanan ti panagraira ti droga iti syudad.
Iti pannakiuman ti Bombo Radyo kenni S/Ins. Antonio Marzan Jr., spokesperson ti San Fernando City Police, kinunana a ti nasao a taripnong ket dimar-ay met amin nga opisyal ti barangay iti syudad.
Sigun kenni Marzan, drug cleared ita ti syudad ti San Fernando base iti report ti City Anti-Drug Abused Council (CADAC), ngem kasapulan pay laeng nga urayen iti resulta ti validation iti Philippine Drug Enforcement Agency.
ImpannaKkel met ti San Fernando City Police, a bimmaba ti nailista a krimen iti syudad sipud nangrugi a maideklara ti war on drugs. ( Absalom Flores)
