Saanen a naisalakan pay dagiti doctor ti maysa a 16 anyos a balasang kalpasan daytoy a nalmes iti karayan idiay Barangay Duplas, San Juan, La Union.
Nabigbig ti biktima a ni Ana Lea De Guzman residente ti Purok 4, Barangay Sevilla, San Fernando City, La Union.
Iti pannakiuman ti Bombo Radyo La Union kenni Clarissa Garcia, panginaen ti biktima, kinuna na a damoda laeng a napan nagdidigos iti nasao a lugar nga agpapamilya.
Naragsak kuna na nga agdigdigos iti igid dagiti kakaanakan a pakairamanan ti biktima.
Nakellaatda laengen idi nga agpaarayat ti biktima.
Dagusda met kuna na a tinulongan daytoy agingga nga uray isuda ket saanda a kinabaelan.
Dagiti lallaki kuna a madama nga agdidigos iti lugar ti nangalaw iti kaanakan na nga awanen ti biag na manipud iti uneg ti danom.
Numan pay nalitemen ti kaanakan na ket nagtitinnulongan dagiti rescuer nga isalbar ti biag na agingga a naiturong daytoy iti pagagasan ngem saanen nga naispal pay ti biag na.
Naamuan nga aguneg iti 20 feet iti lugar a nakalmesan ti kaanakan na.
Ti nasao a biktima ket Grade 10 itan segun iti panginaen na.
