Pimmusay kabayatan a maag-agasan iti Ilocos Training & Regional Medical Center (ITRMC) ditoy syudad ti San Fernando City, La Union ti 16 anyos a barito kalpasan a maipagarop nga nagtinnulongan a binagsol ti agama iti Purok 5, Barangay Sevilla, City of San Fernando, La Union tattay agarup alas-7:00 itay bigat.
Nabigbig ti biktima a ni Miguelito Cea a residente iti nadakamat a barangay idinto a dagiti suspek ket isuda Marlon Cuison, 39, Jerwin Cuison, 16, agpada nga agnanaed iti Purok 6 Barangay Sevilla.
Maibasar iti nakalap nga impormasyon ti Bombo Radyo La Union, madama nga agdaldalos iti motorna ti biktima iti uneg ti lakon dagitoy idi a dimteng dagiti agama a suspek kagiddan iti kellaat a panagbasolda iti imun-una.
Segun kenni Carixe Cea, kabsat iti biktima a nagsagaba daytoy iti tama ti pammagsol iti barukong, sikigan, ken iti baba ti mata.
Iti met palawag ni Elyka Ashley Quiaño, kinuna na a madama nga agdaldalos iti motorna ti biktima idi a dimteng dagiti agama ket kellaatda a nagtinnulongan a bagsolen ti biktima.
Numanpay ginandat na a kamaten dagiti suspek ngem saan na daytoy nga naabotan nga isu ti naala iti CCTV footage.
Iti sabali a bangir, dagus met nga nagluwas manipud Baguio City ti ina ti biktima a ni Catherine Cea kalpasan na maamuan iti napasamak iti anak na.
Inladawanna ti anak daytoy a nasingpet ken awan iti kagurana iti lugarda.
Kinuna na a kas maysa nga ina, nasakit para kenkuana a kastoy laeng iti napagteng para iti pannakatay ti anak daytoy.
Kabayatanna, immuna metten nga inkamang iti pamilya ti biktima ti reklamo iti San Fernando Police Station ngem maipagarop nga winayawayaanda ti ama a ni Marlon a maipagarop a nangtengngel iti biktima idinto a naglibas met iti anak daytoy a Jerwin a nangbasol kenni Miguelito.
