BR LA UNION – Inyanunsiyo ti Department of Education (DepEd) a 16 nga aldaw nga agbakasyon dagiti estudyante ita a holiday season.
Maibasar iti abiso ti ahensiya, mangrugi ti 16-day Christmas break dagiti agad-adal ken mangisursuro inton Sabado, Disyembre 20 ken agpatingga inton Enero 4, 2026.
Agsubli met ti klase inton Enero 5 sumaruno a tawen.
Ti nasao nga addang ket panangsurot ti DepEd Order No. 12 nga inyisyu ni Education Secretary Sonny Angara idi Abril 15, a mangsakop iti Multi-Year Implementing Guidelines iti School Calendar and Activities, a suruten ti public elementary, secondary schools ken community learning centers (CLCs).
Maiyannurot pay daytoy iti tarigagay ni Presidente Ferdinand Marcos Jr. nga eight-point socioeconomic agenda ken ti five-point reform agenda ti Department of Education.
