LA UNION – Umabot iti 18 a fire volunteers iti nagsagaba ti sugat gaputi panagresponde iti nauram nga uppat a kadsaaran a bodega idiay Guidote St., Balut, Tondo, Manila.
Pakaibilangan ditoy ti 14 a lallaki ken uppat a babbai a naggapo ti naduma-duma a fire volunteer group.
Segun iti Bureau of Fire Protection (BFP) a nagsagaba ti first to second degree superficial burns dagiti biktima, partikular iti ima ken rupa dagitoy.
Dagus a naiturong dagiti biktima iti ospital tapno maagasan.
Nabigbig dagiti fire volunteer victims nga isuda:
Christian Cabuhay, 35; Genorskie Saldaña, 35; Arjay Parsalo, 21; Paolo De Malata, 28; Danjake Kawaling; Marlon Floransa; Ejay Castillo, 24; Angel John Bacani, 30; Russell Poblete, 47; Patricia Libis; Danjane Fajardo; Maan Floranza; Bien Antonio; Julio Rafael Lim; John Amene; Patricia Acedo; Joanna Mae Mandap ken Rhazel Jade Parsario, 21.
Nangrugi ti uram iti maikadwa a kadsaaran ti pasdek iti oras alas 7:51 ti rabii idi Huwebes, Agosto 7 ken nagpaut ti uram ti nasurok 24 nga oras.
Narigatan dagiti bumbero a nangserrek iti pasdek/ bodega agsipudta maymaysa ti ruangan daytoy.
Nakalasat met dagiti stay-in nga empleyado babaen iti inaramid da nasilpo-silpo a bado ken tela, tapno makababa dagitoy manipud iti maikapat a kadsaaran ti pasdek.
Iti nasao a second floor ket storage iti hardware products kas ti varnish, pintura, rust remover, ken dadduma pay.
Maipagarop a kukua daytoy ti maysa nga Anna Lim Koo ken maipagarop nga ab-abangan ti maysa a “Mr. Soon.”
Iti inisyal a report dagiti otoridad, umabot iti P19,985,000 ti mapatta-patta a danyos iti nasao nga uram.
