BR LA UNION – Nauram iti tallo a puwesto ti negosyo pasado alas 6:00 idi rabii, Marso 29, 2026 idiay Barangay Pagdalagan Norte, San Fernando City, La Union.
Segun kenni FCINS Edwin Orejudos, fire marshal iti Bureau of Fire Protection (BFP) San Fernando, nakaawatda ti tawag manipud concerned citizen, iti oras alas 6:38 ti sardam.
Dagus a nagresponde dagiti bombero ket nagtitinnulong iti uppat a fire truck manipud BFP-San Fernando, PDRRMO, Philippine Airforce ken Fil-Chinese Chamber of Commerce of La Union, Inc.
Alas 7:10 ti rabii a naan-anay a nakontrol ti apoy ken naideklara a fire out alas 7:13 ti rabii.
Karaman a nauram ti maysa nga puwesto ti auto parts, ken dua a panganan – iti tapsilogan ken paresan.
Naapektaran met ti balay ni Suzima Tumbaga, akinkukua dagiti pa-abangan a puwesto, nga adda iti likudan dagiti nasao a negosyo, ngem saan a nairaman ti kuarto ni Tumbaga.
Iti agdama, agtultuloy ti imbestigasyon ti BFP tapno amwen ti pudno a nagtaudan ti uram ken ti dagup a gatad ti pannakadadael dagiti nauram a puwesto ken tagilako.
Awan ti naipadamag a nasugatan iti nasao nga insidente , ngem adda ti dua nga aso ken maysa a pusa ti maipagarop a nakset iti napasamak nga uram.
Maur-uray ti panangkumpirma ti BFP nu nabaybay-an a paglutuan ti nagtaudan ti uram.
Mainaig ti daytoy, nagpalagip manen ni Orejudos kadagiti rumbeng nga aramiden tapno maliklikan a mapasamak ti uram.
