BR LA UNION – Aganay 95% a nakasaganan ti Commission on Elections (Comelec) para iti umadanin a parliamentary elections idiay Bangsamoro Autonomous Region in Muslim Mindanao (BARMM).
Iti laksid ti ambush a napasamak idi napan a lawas, kinuna ni Comelec Chairman George Erwin Garcia a saan a maapektaran ti panagsagana ti komisyon tapno masigurado ti naballigi nga eleksiyon.
Inlawlawag ti opisyal nga iti laksid ti nakaam-amak nga ambush, maituloy dagiti naituding nga aktibidad kas iti pannakaideploy dagiti balota iti nadumaduma a lokasyon, localized preparations iti tunggal opisina ti Comelec, ken panangisagana dagiti mausar a polling precincts.
Nalpasen ti ballot deployment idiay Tawi-Tawi ken Basilan, idinto a ti target ket malpas ti pannakaideploy amin a balota ken dadduma pay a materyales sakbay nga aggibus ti Agosto.
Kayat ti komisyon a nakasagana amin nga alikamen para iti eleksiyon iti tunggal munisipyo inton umuna a lawas ti Setyembre.
Inlawlawag pay ni Chairman Garcia a maituloy ti maudi a security briefing a naituding iti sumaruno a lawas, ken personal nga agbiyahe nga agturong idiay Bangsamoro Region.
Kadua ti opisyal dagiti lider manipud iti Armed Forces of the Philippines, Philippine National Police, ken Philippine Coast Guard tapno pagsaritaanda dagiti urnos ti seguridad para kadagiti panawen sakbay, kabayatan, ken kalpasan a mismo ti eleksiyon.
Manamnama met a sumarungkar ti convoy iti sumagmamano a lugar idiay Bangsamoro Autonomous Region in Muslim Mindanao.
Ti umuna a parliamentary elections ti rehiyon ket nakatuding a maisayangkat inton Setyembre 14.
