LA UNION – Dua a babbaro iti nasita agingga a naan-anay nga inaresto dagiti otoridad idiay Bangar, La Union gaputi saan a panagsuot ti helmet agingga a nadiskubre dagiti otoridad nga adda pay imet dagitoy a maipagarop a marijuana.
Daytoy ket kabayatan iti insayangkat nga Oplan Sita dagiti otoridad iti Bangar-Luna road, partikular iti sakop ti Barangay Paratong #4, Bangar, La Union.
Dagiti suspek ket isuda: Joshua Florendo, 21, baro, residente ti Barangay Central East #1 , Bangar, La Union ken Jeffrey Ramos, 20, baro, residente met ti Central East #2 ti nadakamat nga ili.
Maibasar iti report, immuna a sinitar dagiti otoridad dagiti suspek gapu iti non-wearing of helmet, noisy muffler, ken kaawan ti driver’s license.
Iti panagsukimat dagiti otoridad, nadiskubreda pay a nagimet dagiti nasao nga agtutubo iti maipagarop a marijuana, iti uneg ti backpack dagiti suspek.
Dagiti suspek ket naipasidong iti kustodiya ti Bangar Police Station para iti umno a disposisyon.
