BR LA UNION – Tarigagay ni Senator Vicente ‘Tito’ Sotto III nga isubli idiay Senado ti random drug testing kadagiti amin nga empleyado.
Kasaruno daytoy iti maipagarop a panagusar ti maysa nga empleyado ti senador ti marijuana iti comfort room ti Senado.
Kinuna ni Senator Sotto, idi isuna ti nagserbi a Senate President, mangisay-sayangkat iti Senate Office of the Sergeant at Arms (OSAA) ti optional drug test kadagiti senador ken random test para kadagiti empleyado.
Malidayan daytoy agsipudta idi nalpasen ti termino na ket nagsardeng metten ti nasao a drug testing.
Kinuna na a maysa a nakababain a pasamak daytoy gaputa arigna nadadael iti imahe ti Senado iti insidente.
Maipalagip nga in-report iti Office of the Sergeant at Arms ni Victor Patelo, ti security personnel a naka-duty iti maikalima a kadsaaran ti Senate building ti naidum-duma nga angot manipud iti comfort room dagiti babbai.
Malaksid dayta, idi Hulyo ket naka-awat manen ti report manipud met iti maysa a lalaki nga staff, a nangibaga nga adda naisang-sangayan nga angot iti nasao a lugar.
Iti maipagarop a naudi a nakita a nagusar ti comfort room ket iti actress a ni Nadia Montenegro nga staff ni Senator Robin Padilla.
Gaputi nasao nga insidente ket pinag-leave of absence pay laeng iti actress.
